Në sallën e Kuvendit Komunal në Preshevë u mbajt një ligjëratë me temën “Korrupsioni në Republikën e Serbisë. Ligjërata u mbajt nga Kryeshefi i Administratës Komunale, me qëllim ngritjen e vetëdijes dhe forcimin e integritetit institucional në ushtrimin e detyrave zyrtare.

Gjatë prezantimit u trajtuan koncepti dhe format e korrupsionit, karakteristikat kryesore të tij, zhvillimi historik në Serbi, lidhja me krimin e organizuar, si dhe veprat penale të parashikuara nga legjislacioni i Republikës së Serbisë që lidhen me korrupsionin.
Pjesëmarrësit u njohën edhe me pasojat që korrupsioni sjell për funksionimin e institucioneve publike, zhvillimin ekonomik, sundimin e ligjit dhe besimin e qytetarëve ndaj administratës publike. U theksua rëndësia e transparencës, përgjegjshmërisë dhe respektimit të ligjit në ushtrimin e funksioneve publike.

Në përfundim të ligjëratës u nënvizua se lufta kundër korrupsionit kërkon angazhimin e çdo nëpunësi publik, zbatim të drejtë të ligjit dhe forcim të integritetit institucional, me synim ofrimin e shërbimeve më cilësore dhe rritjen e besimit të qytetarëve në institucionet komunale.